پاکستان سلامتی کونسل کی قراردادوں کے تحت کشمیر کے تنازع کے حل اور اس کی سوچ کی روشنی میں بھارت کے غیرقانونی زیر قبضہ جموں و کشمیر میں انسانی حقوق کی خلاف ورزیوں کے خاتمے کےلئے اقوام متحدہ کی جنرل اسمبلی کے موثر کردار کا خواہاں ہے۔

پیر کے روز اسلام آباد میں اقوام متحدہ کی جنرل اسمبلی کے منتخب صدر Volken Bozkir سے گفتگو کرتے ہوئے وزیر خارجہ شاہ محمود قریشی نے کہا کہ پاکستان نے بھارتی عزائم کے بارے میں اقوام متحدہ سمیت تمام عالمی فورمز کو آگاہ کیا ہے۔

انہوں نے کہا کہ بھارت نے گزشتہ برس پانچ اگست کو اقوام متحدہ کی قراردادوں اور عالمی قوانین کی صریحاً خلاف ورزی کرتے ہوئے جموں و کشمیر کی خصوصی حیثیت ختم کرنے کا یکطرفہ اقدام کیا۔

وزیر خارجہ نے کہا کہ بھارت کے غیر قانونی زیر قبضہ جموں وکشمیر میں کشمیریوں کا ماورائے عدالت قتل، بے گناہ کشمیریوں پر فائرنگ اور تشدد معمول بن چکا ہے۔

کورونا وائرس کی عالمی وبا سے متعلق شا ہ محمود قریشی نے عالمی وبا کے خاتمے کے لئے عالمی سطح پر جامع مشترکہ کوششیں کرنےکی ضرورت پر زور دیا۔

دونوں رہنماوں نے افغان امن عمل سمیت خطے میں امن و استحکام کےلئے کوششوں پر بھی تبادلہ خیال کیا۔