وزیراعظم عمران خان نے کہا ہےکہ تعمیرات کے شعبے کی ترقی سے کاروباری سرگرمیوں کو فروغ ملے گا اور روزگار کے مواقع پیدا ہوں گے۔
وزیراعظم عمران خان سے ملک کے معروف سرمایہ کاروں اورممتازکاروباری شخصیات نے اسلام آباد میں ملاقات کی۔ سرمایہ کاروں نے حکومت کے دو اہم ترین منصوبوں راوی ریور فرنٹ اربن ڈویلپمنٹ پراجیکٹ اور بنڈل آئی لینڈ میں گہری دلچسپی کا اظہار کیا۔
سرمایہ کاروں اور کاروباری شخصیات نے کہاکہ حکومت کی کوششوں کے نتیجے میں کاروبار سے متعلقہ معاملات میں آسانی پیدا ہوئی ہے اور بہتر پالیسیوں کی بدولت کاروباری برادری کا حوصلہ بلند ہوا ہے۔ راوی ریور فرنٹ اربن ڈویلپمنٹ اور بنڈل آئی لینڈ منصوبوں کے حوالے سے کی جانے والی سرمایہ کاری کا کل تخمینہ آئندہ ہفتے وزیراعظم کو پیش کیا جائے گا۔ وزیراعظم عمران خان نے کاروباری برادری کو یقین دلایا کہ حکومت کاروباری سرگرمیوں کے حوالے سے حائل تمام رکاوٹوں کو ترجیحی بنیادوں پر دور کرنے کیلئے پرعزم ہے۔