پاک فضائیہ کے دستے نے چین میں شاہین 10 فضائی مشق میں کامیاب شرکت کے بعد وطن واپسی پر، پاکستان ایئر فورس کے ایک آپریشنل ائیر بیس پر لینڈنگ کی۔ پاک فضائیہ کے دستے میں شامل جے-10 سی اور جے ایف-17 تھنڈر لڑاکا طیارے، لڑاکا پائلٹس، ایئر ڈیفنس کنٹرولرز اور تکنیکی گراؤنڈ عملے نے مشق میں بھرپور حصہ لیا۔مشق کے ذریعے دونوں اسٹریٹجک اتحادیوں کے مابین حقیقت پر مبنی عصر حاضر کی فضائی جنگ کے منظرناموں کی روشنی میں باہمی کارروائیوں کی توثیق ممکن ہوئی۔ شاہین-10، شاہین فضائی مشقوں کی سیریز میں 10ویں مشق ہے ۔ اس فضائی مشق کی میزبانی دونوں ممالک ہر سال متبادل بنیادوں پر کرتے ہیں۔ پاک فضائیہ اور پیپلز لبریشن آرمی ایئر فورس کے مابین فضائی مشقوں کا یہ سلسلہ انکی پائیدار شراکت داری سے منسوب ہے۔ پاک فضائیہ کے عملے کی فنی مہارت اور جے-10 سی و جے ایف-17 تھنڈر طیاروں کی زبردست فضائی جنگی صلاحیتوں نے پاک فضائیہ کو اس چیلنجز سے بھرپور مشق کے دوران نمایاں کارکردگی دکھانے میں اہم کردار ادا کیا۔