اسلام آباد۔ وفاقی وزیر داخلہ محسن نقوی سے پاکستاں میں امریکہ کی قائم مقام سفیر نیٹلی بیکر نے ملاقات کی ہے۔ ملاقات میں پاکستان-امریکہ تعلقات، باہمی دلچسپی کے امور اور دو طرفہ تعاون بڑھانے پر تفصیلی تبادلہ خیال کیا گیا۔

قائم مقام امریکی سفیر نیٹلی بیکر نے جعفر ایکسپریس اور دیگر دہشت گردانہ حملوں کی مذمت کی اور شہداء کے خاندانوں سے تعزیت کا اظہار کیا۔ ان کا کہنا تھا کہ پاکستان میں دہشت گردی کے حالیہ واقعات میں جاں بحق ہونے والے افراد کے خاندانوں سے دلی ہمدردی ہے۔ ملاقات میں دہشتگردی کے خلاف باہمی اشتراک کار بڑھانے پر بھی بات چیت ہوئی اور رواں سال جون میں کاؤنٹر ٹیررازم ڈائیلاگ منعقد کرنے پر اتفاق کیا گیا۔

اس موقع پر وفاقی وزیر داخلہ محسن نقوی نے کہا کہ دہشت گردی ایک بین الاقوامی مسئلہ ہے، اس سے نمٹنے کے لیے عالمی برادری کو مل کر کام کرنا ہوگا۔حکومت پاکستان دہشت گردوں کے خلاف بھرپور کارروائی کر رہی ہے اور دہشت گردی کے خلاف جنگ کے ضمن میں ہمہ جہتی پالیسی تیار کی جا رہی ہے۔ وزیر داخلہ نے کہا کہ امریکی صدر ڈونلڈ ٹرمپ کے مشکور ہیں کہ انہوں نے دہشت گردی کے خلاف جنگ میں پاکستان کی کاوشوں کو سراہا۔ انہوں نے کہا کہ امریکہ میں غیر قانونی طور پر مقیم پاکستانیوں کی ملک واپسی میں ہر ممکن تعاون کیا جائے گا۔ پاک-امریکہ کاکس کا اجلاس 30 اپریل کو نیویارک میں منعقد کیا جائے گا۔ وزیر مملکت داخلہ طلال چودھری نے کہا کہ پاکستان نے دہشت گردی کے خلاف جنگ میں لازوال قربانیاں دی ہیں ۔ امریکہ ہمارا سٹریٹجک پارٹنر ہے اور باہمی تعاون کو مزید مستحکم کرنے کے اقدامات کئے جائیں گے۔ امریکی قائم مقام سفیر نیٹلی بیکر نے اسلام آباد میں جاری ترقیاتی منصوبوں کی تعریف کی۔


ملاقات میں وزیر مملکت داخلہ طلال چودھری، امریکہ کے پولیٹیکل قونصلر زیک ہارکن رائیڈر اور وفاقی سیکرٹری داخلہ خرم آغا بھی موجود تھے۔ قائم مقام امریکی سفیر نیٹلی بیکر نے طلال چودھری کو وزیر مملکت داخلہ کا منصب سنبھالنے پر مبارکباد دی